2006/08/27

Мах цусандаа шингээж унш

Чихэнд The Offspring-ийн "Want you bad" хангиана. Долоо хоног тутмын Дорнын эдийн засаг (週刊東洋経済) сэтгүүлийн 8.12-19 ний дугаарт миний хүндэлдэг бизнес удирдагч Китао саны (SBI Holdings) ярилцлага гарчээ:

Китао Ёшитака: - Өдөр тутмын их ажлын дунд ном унших цаг гаргахын тулд нойроо хасахаас аргагүй. Миний хувьд өглөөнөөс орой хүртэл завсаргүй төлөвлөгөө, хурал уулзалтаар дүүрч, ихэнх оройд хүлээн авалт, зоогтой байдаг. Тиймээс унтахын өмнө 12 цаг хүртэл 1 цаг, өглөө 4:00-т босч 6:00 хүртэл 2 цаг нийлээд өдөрт 3 цаг ном уншдаг. Уншиж байхдаа улаан балаар зурна, шараар дугуйлж тэмдэглэж, хуудсыг нь нугална, баахан post it наагаад сайн номыг бол тийм байдлаар хэд хэд уншсаар сүүлдээ бүр тэр гэхийн тэмдэггүй болгочихдог. Ер нь номыг бүх анхаарлаа хандуулан шимтэн уншиж мах цусныхаа нэг хэсэг болгох хэрэгтэй. Тэгж уншихгүй бол жинхэнэ уншлага болохгүй.
Гээд тэрээр дараах 5 номыг санал болгосон байна:
1) 田坂広志 『金融業の進化 10の戦略思考』、ダイヤモンド社
2) 森信三(もり・しんぞう) 『終身教授録』、致知出版社
3) 森信三 『人生二度なし』致知出版社
4) 安岡 正篤(やすおか・まさひろ) 『経世瑣言』、致知出版社
5) 安岡 正篤 『いかに生くべきか―東洋倫理概論』、致知出版社

Эдгээр номын танилцуулгыг дэлгэрэнгүй өгүүлсэн байсан ч энд зай болон цаг хэмнэх үүднээс бичихийг азнав (мартахгүй авч уншихын тулд нэрсийг нь жагсааж бичлээ). Тэрээр цааш нь,
- SBI групп маань ар араас нь шинэ бизнес эхлүүлсэн болохоор урт хугацаанд банк санхүүгийн номоор "занималдлаа". Одоо даатгалын салбарт хүч сорих гэж байгаа болохоор энэ чиглэлийн ном нэлээд уншиж байна. Түүнээс гадна сүүлийн үед эрүүл мэнддээ санаа тавин анагаахын ном ч эргүүлдэг болоод байгаа. Өөрт тааруулан биеийн тамираар ч хичээллэж байна. Гэхдээ гольф тоглодоггүй юм. Гольф бол ирж очих гэсээр байтал хагас өдөрөө алдана. Хагас өдөр олдвол ном уншихгүй юу. Ер нь цаганд хэр харамч байна гэдгээс тэр хүний амьдрал хамааралтай байдаг шүү дээ.
гэх зэргээр манай хүн урсгаж өгч.

Товч танилцуулахад SBI Холдингс бол байгуулагдаад зургаахан жилийн дотор асар хурдтай томорсон санхүүгийн групп юм. Венчер хөрөнгө оруулалт, үнэт цаасны арилжаа, үл хөдлөх хөрөнгө, ассэт менежмент, санхүүгийн үйлчилгээ зэрэг явуулдаг 30 гаран охин компанитай. Яхүү файнанс сайт дээрээс энэ группын амжилтыг харж болно. Операцийн ашиг (営業利益) нь 2004 онд 8 тэрбум иен, 2005 онд 24 тэрбум, 2006 онд 50 орчим тэрбум иен гэж геометр прогрессоор өсч яваа. Би вэбсайт дээрх тэдний группын нэвтрүүлэг SBI channel-ийг хааяа үздэг юм. Суваг гэхээс голцуу л Китао саны яриа л даа. Ямар дүр төрхтэй, ямар яриатай хүн болохыг тэндээс харж болно. Магадгүй японд байгаа хүмүүсийн зарим нь телевизээр харсан байх.

2 comments:

Tuvshin said...

Nad shig yapon hel medehguy humuust sonirholtoy baih geed tavichihlaa ;)

http://translate.google.com/translate?hl=en&sl=ja&u=http://www.toyokeizai.co.jp/mag/toyo/2006/0812/index.html&sa=X&oi=translate&resnum=1&ct=result&prev=/search%3Fq%3Dhttp://www.toyokeizai.co.jp/mag/toyo/2006/0812/index.html%26hl%3Den%26lr%3D%26rls%3DHPIB,HPIB:2005-15,HPIB:en

Togi said...

Google deer avtomat orchuulga hiilgej uzeegui yum baina. Bayarlalaa, sonin baina shuu.